На заедничкиот, традиционален собир организиран од Судиската комисија на кошаркарски судии и делегати на град Скопје, беа прогласени најдобрите поединци во судиската организација за календарската 2025 година.
Главното признание – наградата за најдобар судија на град Скопје за 2025 година – заслужено му припадна на Зоран Митровски, кој со својата конзистентност, професионалност и авторитет на теренот се издвои во изминатата година.
Својата прва индивидуална награда во судиската кариера ја доби Иван Ников, кој беше прогласен за најперспективен судија, признание што претставува потврда за неговиот напредок и потенцијал во судиската фела.
Посебен момент на настанот беше доделувањето на плакетата за животно дело на Марјан Тодоровски, човек кој повеќе од четири децении е нераскинливо поврзан со кошарката. Од 1977 година па сè до денес, Тодоровски остави длабока трага, најпрво како кошаркарски судија, а потоа и како делегат, со огромен придонес во развојот и унапредувањето на судиската организација.
Со пригодна благодарница, Судиската организација на град Скопје му оддаде признание и на Влатко Цветаноски, за неговите посебни заслуги и континуирана поддршка во развојот на кошаркарското судење.
