Кочани ќе биде домаќин на хуманитарни спортски натпревари со цел поддршка на социјално најзагрозените семејства во градот. Настанот ќе се одржи во недела, на 28 декември 2025 година, во спортската сала „Кочански Ангели“, со почеток од 17:00 часот.
Програмата започнува со фудбалски натпревар помеѓу помладите категории на ФК Фудбал Старс и ФК Кочани, по што следува футсал-дуелот меѓу КМФ Фудбал Старс – Аутовелт и КМФ Кеги Моби од Велес, закажан за 18:00 часот.
Екипата на Фудбал Старс Аутовелт е дебитант во Втората футсал лига, а пак Кеги Моби е тим кој заврши на третото место во есенскиот дел на Првата футсал лига.
Влезот за настанот ќе изнесува 100 денари, а сите собрани средства ќе бидат наменети за помош на семејствата на кои им е најпотребна поддршка во пресрет на новогодишните празници.
Хуманитарните натпревари се организираат со силна поддршка од Општина Кочани, како и соработка со КМФ Кеги Моби од Велес, а организаторите упатија отворена покана до сите граѓани да бидат дел од овој настан и преку спортот да покажат солидарност и хуманост.
Кочани уште еднаш докажува дека спортот може да биде многу повеќе од резултат – може да биде начин да се подаде рака таму каде што е најпотребно.
