Заврши есенската полусезона во ракометната Суперлига со одигрување на 18 кола, со што покрај пласманот на екипите познати се и повеќе статистики, а меѓу која и таа за најдобрите стрелци во ракометната елита на Македонија.
Најдобриот стрелец во Суперлигата доаѓа од редовите на Прилеп, Димитар Димитриоски кој пристигна летото во градот под Марковите кули постигна 122 погодоци на 18 натпревари, неговиот просек е 6.78 по натпревар.
На второто место е Мохамед Азиз Бен Махфоудх со постигнати 115 погодоци, исто така на 18 натпревари, а пак ракометарот на Пролет, Давор Палевски има 107 погодоци на 18 натпревари. Уште двајца ракометари има со троцифрен број на погодоци – Филип Николов за Бутел одигра 17 натпревари и постигна 100 погодоци, а пак Александар Стојков е најдобар стрелец за Куманово со сто гола.
Останатите ракометари имаат двоцифрен број на погодоци – Здравко Постолов е најдобар стрелец на Радовиш, а на листата на стрелци е шести со 93 гола, но со 16 натпревари, Наум Костов за Струга постигна 89 гола и се наоѓа на седмото место, а толку има и ракометарот на Прилеп, Денис Шабановиќ.
Пикерот Стефан Атанасовски за Струга постигна 86 гола и со тоа е деветти на листата на најдобри стрелци, а пак Петар Атанасијевиќ за шампионот Еурофарм Пелистер постигна 81 гола.
Најдобар стрелец на Вардар е Дмитро Хориха со 75 гола, а тој е на 13. место на листата на стрелци, а пак Мартин Серафимов со 74 гола е најдобар стрелец на Алкалоид, а се наоѓа на 15-тото место. Најдобар стрелец на Охрид е Дарко Џукиќ со 68 гола и се наоѓа на 19-тото место.
