Филип Поповски повторно ја потврди својата репутација на врвен македонски фудбалски професионалец со ангажманот како делегат на синоќешното мега-дерби од групната фаза на Лигата на шампионите помеѓу Реал Мадрид и Манчестер Сити на „Сантијаго Бернабеу“. Овој престижен ангажман е доказ за угледот на македонските фудбалски професионалци и за високото место на Фудбалската федерација на Македонија во европските фудбалски структури.
Поповски е еден од највисоко котираните македонски претставници во УЕФА и редовно се ангажира на врвни меѓународни натпревари. Поранешниот прв оперативец во „Куќата на фудбалот“ беше делегат и на финалето на последното Европско првенство, што дополнително ја потврдува довербата и професионалноста што ја ужива на европската фудбалска сцена.
За време на престојот во Мадрид, Поповски беше пречекан од легендарниот Емилио Бутрагењо, задолжен за протоколот на Реал Мадрид. Легендата со симпатии се присети на гостопримството во Македонија и на топлото скопско лето за време на УЕФА Суперкупот 2017, а разговорот ги потсети и на спомените за Кирил Дојчиновски, кој му беше тренер на Бутрагењо во Мексико, а подоцна повторно се сретнаа и во Скопје.
Ангажманот на Поповски на еден од најгледаните натпревари во светскиот фудбал е уште една силна потврда за квалитетот, професионалноста и довербата што македонските фудбалски претставници ги уживаат во УЕФА.
