Фудбалерките на Борец конечно се израдуваа на првиот сезонски триумф во Втората женска лига, откако на гостувањето во скопско Горно Лисиче славеа со убедливи 0:8 против екипата на Слободен, во рамки на 7. коло.
Домашниот тим беше целосно инфериорен на теренот, а велешанките уште во првото полувреме го најавија големото славје со водство од 0:5.
Најрасположена за игра беше искусната Олгица Арсова, која блескаше со хет-трик, додека Ивана Спасиќ се запиша со два погодоци. Победата ја заокружија и Јоана Никова, Јована Гроздевска и Ана Јавашева, кои по еднаш ја затресоа мрежата.
Со овој убедлив триумф, Борец ја прекина серијата од шест порази во низа и конечно стигна до првите бодови оваа сезона, што е охрабрувачки сигнал за продолжението од првенството, иако тимот сè уште останува на дното од табелата.
