Во седиштето на УЕФА денеска беа извлечени групите за квалификациите за Светското првенство во женска конкуренција, кое ќе се одржи во 2027 година во Бразил.
Женската фудбалска репрезентација на Македонија квалификациите ќе ги започне во Лига Ц, каде што има вкупно шест групи. Натпреварите од оваа фаза ќе се одиграат во март, април и јуни 2026 година.
Пласман во следната рунда ќе обезбедат победниците од сите шест групи, како и две најдобро рангирани второпласирани селекции. Тие ќе имаат можност преку баражи да се борат за место на Мундијалот против второ и трето пласираните тимови од Лига А.
Баражите се закажани за октомври и ноември 2026 година, додека интерконтиненталните баражи ќе се одиграат во февруари 2027 година.
Македонија ќе се натпреварува во групата Ц3, каде противници ќе ни бидат Унгарија, Азербејџан и Андора. Нашите девојки ќе имаат јасна цел – да се борат за прво место и историски пласман во баражот што води кон Светското првенство во Бразил.
