Тиверија Брера со убедливи 6:1 го декласираше Ас Јунајтед од Струга во меч на тотална доминација на струмичанки на домашен терен. Ива Јосифова беше стрелец на два гола, а по еден гол постигнаа Пецева, Гоја, Панеска и Галабовска.
Шампионот Љуботен со 3:0 го доби повратникот во елитата Атлетико од Битола во натпревар каде искусната голгетерка Хава Мустафа постигна два гола, а еден гол постигна Паула Алехандра Валбуена Новоа.
Истатов на домашен терен претрпе пораз од Скопје со резултат од 1:2 во натпревар каде Рабија Дервиши по седум минути игра постигна гол за 0:1, а во 30, минута Бесарта Фида си постигна автогол за 1:1 на полувреме.
Во второто полувреме Сара Коларовска ги постави конечни 1:2 во 90. минута.
Речица на домашен терен доживеа висок пораз од Каменица Саса со резултат од 1:6, па „рударките“ по големиот пораз од Тиверија Брера се „истурија“ врз немоќната Речица. Ева Андонова во 3. минута погоди за 0:1, а хет-трик за гостинскиот тим запиша бугарската интернационална Антонина Шопска, а два гола постигна искусната голгетерка Ана Димитровска. За домашниот тим единствен стрелец беше Емили Митковска во 55. минута.
Во рамки на оваа рудна слободна беше екипата на Топ Гол од Битола.
