Ракометарите на Прилеп продолжија со добрите партии во новата сезона и пред своја публика ја совладаа Струга со резултат 34-26. „Тутунарите“ со овој триумф стигнаа до третиот сезонски успех и се искачија погоре на табелата, освојувајќи важни бодови против директен конкурент.
Гостите од Струга подобро го отворија натпреварот и во првите петнаесетина минути имаа предност од 8-6, па дури и напад за „плус три“. Но кога не ја искористија шансата, Прилепчани заиграа далеку поагресивно и брзо израмнија на 10-10. Од тој момент почна пресврт кој го одбележи целиот натпревар.
Домашните ракометари примија само еден гол во следните дваесетина минути, а постигнаа дури 11 по ред, со што резултатот нагло скокна на 23-11. На тој начин дилемата околу победникот беше решена уште во раната фаза од второто полувреме.
Иако Струга успеа да намали на 29-22 во финишот, немаа сили за целосен камбек. Прилеп рутински ја приведе средбата до крај и славеше со убедливи 34-26.
Кај победниците најефикасен беше Денис Шабановиќ со шест гола, додека Тренчевски и Димитриоски погодија по пет пати. Кај стружани се истакна Наум Костов со осум гола, а Мечкароски постигна седум.
Во следното коло Прилеп ќе има сериозен предизвик со гостувањето кај Вардар во Скопје, додека Струга ќе се обиде да се рехабилитира пред својата публика против Куманово.
