Беласица за новата сезона во Втората лига се засилува со двајца играчи, според информациите на Спортска Мрежа, Марио Наумоски и Анатолиј Петејчук ќе бидат нови играчи на струмичката фудбалска гордост, која и во новата сезона ќе ја води искусниот стратег Александар Стојанов на патот кон Првата лига.
Наумоски е 24-годишен фудбалер кој во Струмица доаѓа од редовите на Македонија ЃП, претходно, беше дел од Пелистер, Победа, Брегалница, Металург и Кожуф од Гевгелија. Тој ќе биде одлично засилување за Беласица и ќе претставува вистинско освежување.
Петејчук е 22-годишен фудбалер кој низ својата кариера помина низ екипите на Вардар и Победа на домашната сцена, а прилепчанецот во Струмица ќе носи и меѓународно искуство настапувајќи за екипи од Германија, како и хрватскиот тим Граничар од каде доаѓа во Струмица.
Претходно, Беласица го задржа Александар Коцев, играч кој е еден од најдобрите во лигата и ќе биде клучен во новата сезона во која Беласица ќе цели на местата кои водат кон Прва лига.
Во следниот период се очекуваат уште неколку засилувања во редовите на Беласица.
