Градскиот фудбалски клуб Тиквеш 1930 од Кавадарци денеска го означи официјалниот старт на подготовките за сезоната 2025/26 со првиот прес по преземањето од страна на германскиот инвеститор Осман Таш. На настанот, заедно со градоначалникот на Кавадарци, Митко Јанчев, и претставници на Општината, беа најавени нови амбициозни проекти кои треба да го подигнат клубот на повисоко професионално ниво.
Инвеститорот Осман Таш истакна дека неговата визија е јасна – модернизација на тренажниот процес, професионален однос кон фудбалерите и силен фокус на младинската школа. Главната цел е клубот да се издигне до стабилен прволигаш со европски амбиции.
Како дел од новиот проект, најавено е и отворање на фан-шоп во центарот на Кавадарци, во соработка со верните навивачи Лозари – Исток, што ќе придонесе за уште поголема поврзаност на клубот со локалната заедница.
Претседателот на клубот, Миле Масларков, изрази задоволство од завршените повеќемесечни преговори со инвеститорот и посочи дека новото партнерство ќе донесе стабилност и напредок.
Нов директор на клубот е Емир Шабани, кој најави проширување на играчкиот кадар со нови имиња, вклучително и меѓународни засилувања, со цел Тиквеш да биде конкурентен во секој натпревар.
Подготовките започнуваат денес (3 јули) на Градскиот стадион во Кавадарци, а тимот ќе продолжи со интензивна работа на подготовки во Турција од 15 до 25 јули.
Со нови сили, поддршка и амбиција, Тиквеш влегува во новата сезона со цел да се врати таму каде што припаѓа – на врвот на македонскиот фудбал.
