На 19 јуни 2025 година беше испишана нова страница во историјата на спортот во нашата земја. Федерацијата на училишен спорт на Македонија доби ново раководство, а за првпат на чело на оваа значајна институција застана жена – Елена Мицковска, истакнат спортски работник, поранешна кошаркарска репрезентативка и личност со богато искуство во спортските и делегациските структури.
Нејзиниот избор претставува силен симбол на напредок и модерно управување, како и поттик за родова еднаквост во спортските институции. Со својот професионален бекграунд и посветеност, Мицковска најавува нова ера исполнета со визија, интегритет и решителност за подигнување на квалитетот на училишниот спорт, но и за поттикнување на младите генерации да изберат здрав начин на живот преку активна спортска ангажираност.
Во рамки на денешниот состанок на Извршниот одбор на Федерацијата, беа доделени и специјални признанија на поединци и институции кои во изминатиот период со несебична работа придонеле за развојот на училишниот спорт во Македонија.
Нивната улога во подигнување на свеста за значењето на физичката активност кај учениците од основното и средното образование беше посебно истакната, како инспирација за идните генерации.
Федерацијата најави дека и во иднина ќе продолжи со континуирани активности насочени кон градење на спортска култура, развој на тимска работа и спортски дух кај младите, како и јакнење на мрежата на спортски едукатори, наставници и тренери кои се клучен дел од целокупната мисија.
Изборот на Мицковска и доделените признанија се јасен показател дека Федерацијата влегува во ново и прогресивно поглавје, подготвена за соработка, дијалог и заеднички успех во изградбата на поздрави и поактивни млади генерации во Македонија.
