Фудбалскиот терен во Големо Коњари интензивно се реконструира со цел да ги исполни условите за одигрување на натпревари од Втората македонска фудбалска лига.
ФК Големо Коњари, по долга пауза, се врати во Втората лига, а управата на клубот, заедно со сите поддржувачи и љубители на фудбалот, се активни во создавање на услови за натпреварување на домашен терен.
Спортска Мрежа ја посети локацијата, каде што во тек се работи на целосна реконструкција на соблекувалните. Внатрешноста се реновира со нови плочки, тушеви и сите неопходни елементи за обезбедување удобни и функционални простории за домашните и гостинските фудбалери.
Покрај тоа, се вршат активности за уредување на просторот околу теренот и за поставување на трибини. Во следниот период ќе ја посетиме спортската локација повторно, непосредно пред почетокот на новата сезона.
Целта на новиот второлигаш е јасна – Втора лига фудбал да се игра на фудбалскиот терен во прилепското село Големо Коњари.
Како што претходно ексклузивно информираше Спортска Мрежа, нов тренер на ФК Големо Коњари е Јовица Блажевски.
