Во недела, екипата на Слога Виница ќе го подигне шампионскиот пехар во Третата македонска фудбалска лига – Исток, со што тимот на Емил Грнев ќе се насочи кон баражот за можен пласман во Втората македонска фудбалска лига.
На истиот ден, Слога Виница ќе го одигра и последниот домашен натпревар за оваа сезона против екипата на Карбинци. Тимот на Грнев има скор од 15 победи и само еден пораз – токму од Карбинци, што го прави дуелот уште поинтересен.
Слога Виница доминираше во тековната сезона со најефикасен напад (87 постигнати голови) и најдобра одбрана (само шест примени голови). Тимот од Виница изгради квалитетна екипа која е неколку нивоа над останатите третолигаши од Истокот, но сега следи најважното – баражот за Втора лига.
Веќе речиси се познати сите учесници во баражот: Слога Виница (Исток), Шкендија Арачиново (Север), Тетекс (Запад), Преспа (Југозапад – официјализација се очекува во следното коло), како и Големо Коњари (Југ – се очекува да биде потврден за две кола). Од Втора лига, најверојатно Осогово ќе игра бараж за опстанок.
Отворено останува прашањето – дали откажувањето на Воска Спорт од Првата лига ќе отвори дополнително место за третолигаш? Ќе се спаси ли некој второлигаш? Подготвуваме специјална емисија на оваа тема – гледајте нè во следните денови на Спортска Мрежа.
