Оваа година се одбележува 10-годишнината од основањето на УЕФА Фондацијата за деца – организација која веќе една деценија посветено работи на подобрување на животите на децата кои се соочуваат со различни предизвици.
Фондацијата, во соработка со националните фудбалски асоцијации, докажа дека фудбалот е многу повеќе од спорт. Тој претставува средство за надеж, пријателство, образование, здравје и создавање нови можности за иднината на младите генерации.
Од 2015 година досега, фондацијата постигна значаен напредок: поддржани се 128 активни проекти и финансирани се вкупно 577 иницијативи во 138 земји ширум светот.
Фудбалската федерација на Македонија (ФФМ), во соработка со УЕФА Фондацијата за деца и фудбалскиот клуб Карпошово, ќе го одбележи овој важен јубилеј преку нов инклузивен проект насловен Фудбал за сите.
Проектот има за цел организирање фудбалски активности за деца и млади со Даунов синдром и лесна попреченост. Преку стручна обука и прилагодени тренинзи, ќе се создаде средина каде што сите деца ќе можат активно да учествуваат, без разлика на нивните способности.
Виолета Јанчева, Спортска Мрежа
