Селекторот на машката сениорска одбојкарска репрезентација на Македонија, Јошко Миленкоски, во соработка со Одбојкарската федерација на Македонија, ја утврди програмата на националниот тим за претстојните летни предизвици – Златната Европска лига 2025 и вториот дел од квалификациите за Европското првенство 2026.
Подготовките ќе започнат на 15 мај, кога репрезентативците ќе се соберат во хотелот „Горан Пандев’’ во Струмица. Таму ќе се одработи првата недела од тренажниот процес во пресрет на Златната Европска лига.
Како дел од подготовките, на 24 и 25 мај, Македонија ќе одигра пријателски двомеч со селекцијата на Хрватска во Марибор. Овие натпревари ќе послужат како важна проверка на формата и тимската хемија пред почетокот на официјалните мечеви во Европската лига.
Струмица ќе бида базата на сениорите во месец јуни. Од 6 до 8 јуни Македонија игра на првиот турнир од Златната Европска лига во Братислава, Словачка, каде покрај домаќинот за противник ќе ја има и селекцијата на Финска.
Вториот турнир одбојкарите го играат една недела подоцна од 13 до 15 јуни во Рига против Летонија и Грција. Македонија ќе биде домаќин на еден од трите турнири во третиот викенд од годинешното издание, кога од 20 до 22 јуни во салата „Парк’’ во Струмица, ќе ги пречека репрезентациите на Црна Гора и Израел. Доколку Македонија се најде меѓу првите четири екипи во генералниот пласман по комплетирањето на турнирите ќе се најде на Ф4 турнирот, кој на 5 и 6 јули ќе се одржи во Брно, Чешка.
По завршувањето на настапот во Златната Европска лига, македонската репрезентација ќе добие тринеделен одмор, по што новиот собир е закажан за 20 јули во Маврово. Овој дел од подготовките ќе биде насочен кон темпирање на формата за претстојните квалификациски дуели со Грција и Грузија за пласман на Европското првенство 2026.
По седум дена подготовки во Маврово, нашата селекција ќе замине за Софија, каде на 29 и 30 јули ќе одигра два контролни натпревари со домаќинот Бугарија. По повратокот од Бугарија, репрезентативците ќе се стационираат во Скопје, каде ќе ја одработат завршната фаза од подготовките пред официјалните квалификациски средби.
Како завршна проверка пред стартот на квалификациите за Европското првенство 2026, македонската сениорска репрезентација ќе настапи на 49-то издание на традиционалниот меморијален турнир „Бранко Хаџи Иљоски – Чајка’’. Турнирот ќе се одржи од 5 до 7 август во салата „Борис Трајковскi’’ во Скопје, а покрај Македонија, учество ќе земат и селекциите на Бугарија и Швајцарија.
Квалификацискиот циклус македонската репрезентација ќе го започне на 13 август со гостување кај Грција во Атина. Последниот натпревар, кој воедно ќе биде и завршница на летниот репрезентативен календар, е закажан за 17 август кога Македонија ќе ја пречека селекцијата на Грузија во салата „Борис Трајковски’’во Скопје.
Виолета Јанчева, Спортска Мрежа
