Шампионот Еурофарм Пелистер забележа победа во „Билјанини Извори“ откако со 23:26 го доби Охрид во рамки на 2. коло на плеј-офот на Суперлигата.
Шампионот се намачи одново против Охрид, кој одново се покажа дека е тежок и тврд противник во „Билјанини Извори“.
Ракометарот на Еурофарм Пелистер, Филип Кузмановски во изјава за Спортска Мрежа истакна дека нема лесен противник во плеј-офот и дека тие се подготвуваат максимално за секој меч.
„Пред сѐ, максимално се подготвуваме за секој натпревар, секое гостување е навистина тешко во плеј-офот, нема лесен натпревар и не треба никого да потцениме особено не Охрид. За сите противници се спремаме максимално, сакаме да изгледаме како Лигата на шампионите и да имаме таков пристап, и мислам дека тоа и го покажуваме. Нормално, Охрид никако не треба да го потцениме затоа што и за следната година, па и за во иднина, покажува како треба да изгледа и да се гради еден тим, имаат многу звучни имиња за следна сезона и веруваат во тој проект, градот живее за ракометот, како и нашиот, секако, мислам дека денес бевме вистинска екипа, поддржани со нашата навивачка група „Чкембари“, која секогаш е во максимален број и тоа ни дава голема поддршка и навистина многу ни значи“, рече Кузмановски за Спортска Мрежа.
Кузмановски за Спортска Мрежа го најави и следниот меч со Алкалоид кој го играат во Битола.
„Одиме напред, навистина сакаме да постапиме шампионски и за следниот натпревар заслужено да ја наполниме салата и да го пречекаме Алкалоид, за секој натпревар се спремаме максимално, па така и за нив. На секој натпревар сакаме да одиме на победа и оваа година сакаме да бидеме шампиони и тоа треба да го покажеме и на теренот“, рече Кузмановски во изјавата за Спортска Мрежа.
Кузмановски беше најдобар стрелец на мечот против Охрид со постигнати 12 гола.
