Фаворитите според планот го отворија пролетниот дел во Трета лига – Југ со денешните натпревари од 14. коло.
Лидерот Големо Коњари на крилата на Беким Алимоски кој беше двоен стрелец со 2:0 славеше над Питу Гули од Крушево и одлично тргна Големо Коњари во пролетниот дел.
Пеце Стојанов ја „искина“ мрежата со четири голема за огромна победа преку пресврт на Превалец од 4:1 на домашен терен против Бучин.
Гостинотпреку Андреј Николовски во 37. минута го отвори резултатот за 0:1 на полувреме, а во вториот дел Пеце Стојанов со четири голови сам го победи гостинот со што трите бодови останаа дома.
Тимот на Превалец кој има амбиции за првото место и баражот за Втора лига одлично ја отвори пролетната полусезона и најавува силен атак за баражот.
Во Кривогаштани домаќинот Младост забележа „лото“ победа од 7:1 над Ултрас кој немаше капацитет да парира. Антонио Димоски постигна четири гола, Мартин Деркоски беше двоен стрелец, а еден гол постигна Димитар Китаноски, додека пак за гостинот во 90. минута гол постигна Игор Паноски.
Екс второлигаш Росоман на домашен терен преку пресврт со 1:2 загуби од Башкими 2008 во меч каде беа поделени девет жолти картони, а од игра во финишот од мечот беше исклучен Стефан Костовски поради два жолти картони.
Мартин Темелковски во 14. минута погоди за 1:0 и водство на домашниот тим кој имаше минимална предност по првите 45 минути. Во вториот дел Аљбим Јашари постигна гол за 1:1, а во 72. минута Зани Ахмедовски направи комплетен пресврт на конечни 1:2.
Венец во Долни Дисан без проблеми го совлада Влазними Јуниор со високи 4:0. Стефан Димитриевиќ беше стрелецна два гола, а гол постигна и Петар Ристовски, додека пак Аџи Фејзулаи си постигна автогол.
Слога во Лажани преку Емир Каришиќ го декласираше во секој фудбалски сегмент Дреново со 7:0, а каде Емир Каришиќ постигна четири гола.
Виктор Стојаноски беше двоен стрелец во 65. и 82. минута, а конечните 7:0 ги постави Фатон Ибраими во 84. минута.
