Ракометниот клуб Алкалоид забележа убедлива победа на гостувањето во Италија, совладувајќи го тимот на Бриксен со 44:32 (23:18) во првиот натпревар од осминафиналето на ЕХФ Европскиот куп.
Тимот предводен од легендарниот Кирил Лазаров прикажа одлична игра во текот на целиот меч, контролирајќи го резултатот од самиот почеток па се до крајот. Алкалоид брзо создаде предност во првото полувреме, наметнувајќи силен ритам и агресивна одбрана што го остави противникот без решение. Во првиот дел голманите имаа одлични одбрани Кизиќ имаше осум одбрани, Галевски фати два пенали и со тоа заминаа на полувреме со пет разлика.
Во вториот дел прикажаа сигурна одбрана и одличен напад со што веќе јасно беше дека тимот на Кирил Лазаров цели кон сигурна победа. Најдобар стрелец во тимот на Алкалоид беше Марко Митев со седум и Игор Ѓоргиев исто така со седум гола, додека пак Мартин Серафимов и Александар Петковски постигнаа по шест гола.
Во тимот на Бриксен се истакнаа Де Оливеира Кандидо со осум и Арчиери со седум гола. Реванш натпреварот помеѓу Алкалоид и Бриксен се игра во Скопје во салата „Автокоманда“ на 22 Февруари. Останува да видиме дали момците на Кирил Лазаров ќе успеат да ја завршат работата на домашен терен и да продолжат со победничката низа во ЕХФ Европскиот куп.
Виолета Јанчева за Спортска Мрежа
