Охридскиот прволигаш Воска Спорт во пролетниот дел од сезоната ќе има навистина тешка задача кога е во прашање обезбедувањето на опстанокот. За таа цел Воска Спорт се засили со неколку играчи, а последен кој доаѓа е Давид Матески.
Се работи за 18-годишен фудбалер од Охрид, кој доаѓа од кратовскиот прволигаш Силекс, а претходно тој беше дел од второлигашот Охрид.
Матески не добиваше голема минутажа во кратовскиот тим, во неговиот престој одигра 13 натпревари и забележа три асистенции, а притоа на теренот помина 434 минути.
Пролетниот дел Воска Спорт го отвара на домашен терен против Беса во дерби на две екипи кои сакаат сигурен опстанок во елитата.
