Денес на стадионот во Кратово се одигра „генералката“ меѓу прволигашот Силекс и второлигашот Детонит Плачковица од Радовиш, каде успешна „генералка“ имаше радовишкиот тим, кој беше подобар со 1:2, во меч каде трите погодоци беа постигнати во првиот дел од мечот.
Тимот на Горан Здравков прв дојде до водство преку Лука Трајковски, а потоа Дамјан Масевски ја дуплираше предноста на 0:2. Пред крајот на мечот Ади Алиќ постигна гол и намали на 1:2 на полувреме.
Во вториот дел мрежите мируваа и на двете страни, па резултат од првите 45 минута стана конечен за триумф на Детонит Плачковица против Силекс, кој е воден од Александар Васоски.
Во изјава за Спортска Мрежа, шефот на стручниот штаб на Детонит Плачковица, Горан Здравков, изјави дека е задоволен од денешниот натпревар на неговите играчи, додава дека имале добри подготовки, но како што ни изјави сега останува тоа да се материјализира и во првенството.
„Денес одигравме добар натпревар во Кратово против прволигашот Силекс. Задоволен сум од залагањето на фудбалерите на теренот на денешниот меч. Позитивна атмосферата кај сите фудбалери. Имаме добро изработени подготовки, сега ни преостанува тоа да го материјализираме и во првенството“, ни изјави тренерот Горан Здравков.
Во пролетниот дел од Првата лига екипата на Силекс која е лидер ќе атакува на освојување на титулата, со што после долги години истата да биде вратена во Кратово, а пролетниот дел Силекс го отвара дома против Тиквеш.
Од друга страна, Детонит Плачковица склопи одличен тим и сега во пролетниот дел радовишани одново ќе атакуваа на местата за Прва лига, со реална опција за нов бараж за Прва лига.
Пролетната полусезона во Првата и Втората лига започнува следниот викенд.
