Прволигашот Атлетикот од Битола за пролетната полусезона во Првата женска фудбалска лига се засили со Сандра Триста која доаѓа од редовите на градскиот ривал Топ Гол.
19-годишната битолчанка го засилува нападот на тимот предводен од Никола Гелевски, а ќе биде и големо освежување за пролетниот дел.
„Сандра е доста умна, вредна и поседува голема желба да се докажува и одлично се вклопува со нашите идеали, додавајќи нова димензија и конкуренција во нашиот шампионски состав. Имено, Сандра е десничарка, игра на позиција напаѓач и е силна, снаодлива и многу добра со топката во своите нозе, а овие карактеристики додаваат нови тактички варијации во нашиот напад. Ние ќе се потрудиме да обезбедиме најдобри услови за тренинг и развој, со цел да ја поттикнеме желбата за фудбал кај нашите девојки и да им помогнеме во напредокот на нивните кариери“, вели тренерот Никола Гелевски по промоцијата на Триста во Атлетико.
Атлетико презимува на седмото место на табелата со седум освоени бодови, а пролетниот дел го отвара против Каменица Саса на гостински терен.
