Ракометарите на Охрид ги започнаа зимските подготовки за вториот дел од сезоната во Суперлигата. Тренерот Стевче Алушовски го имаше првиот собир со ракометарите во Спортската сала „Билјанини Извори“ со што беше означен стартот на подготовките со првиот тренинг.
На првиот тренинг присутни беа сите играчи, а меѓу нив беше и новото засилување, Бразилецот Винициус.
„Екипата првиот дел од подготовките ќе ги обработува во Охрид, па потоа од 23. до 29. јануари, „гладијаторите“ се на припреми во Белград, Србија, каде што ќе учествуваме на силен турнир, „Трофеј Вук Рогановиќ“, каде што освен ГРК Охрид ќе учествуваат и екипите на РК Партизан и РК Панчево од Србија, како и екипата на РК Нексе од Хрватска. По турнирот ќе ги одмериме силите и со РК Металопластика Шабац и шампионот на Србија, екипата на РК Војводина. Пред почетокот на вториот дел од првенството во Охрид ќе ни гостува екипата на РК Куманово“ – изјави спортскиот директор на ГРК Охрид, Славчо Ристески.
Охрид во есенскиот дел има учинок од 12 победи, едно реми и три порази и вкупно 25 бодови на своето конто, а пролетниот дел го отвара со гостување во Велес кај дебитантот Бисинов.
