Брегалница е една од двете екипи во Првата македонска фудбалска лига која и натаму нема победа на гостински терен во досегашните 10 кола. Заедно со Скопје, штипјани имаат освоено само еден бод од туѓ терен сезонава, и „сините“ тешко играат кога се надвор од Штип.
Денеска Брегалница гостува кај Арсими, тим кој од друга страна нема пораз на свој терен, со скор од една победа и четири нерешени средби.
Од таборот на штипјани се надеваат дека, конечно, ќе биде „скршен мразот“ и ќе се израдуваат на еден триумф на гости. Исто така од таборот на Брегалница посакуваат да биде прекината и мини серијата на порази која трае два меча.
„На секој натпревар одиме на победа, без разлика дали играме дома или на гости. Знаеме дека на гости играме потешко, но мислам дека е добар момент да дојдеме до првиот гостински триумф. Не смееме да потцениме никого, но ќе дадеме се од себе да стигнеме до трите бода иако сме свесни дека задачата ќе биде тешка. Атмосферата во екипата е добра, сите сме подготвени да дадеме максимум и да ја исполниме целта, да дојдеме до добар резултат“, изјави Мартин Стојанов.
Мечот Арсими – Брегалница се игра во Гостивар со почеток во 12:00 часот.
