Струга Трим Лум ја запиша првата гостинска победа оваа сезона, откако славеше со 2-0 против Шкендија Арачиново, додека Вардар освои важни три бода на гостувањето кај Брегалница во Штип, благодарение на погодокот на Бобан Николов.
Стружани одиграа доминантен натпревар и уште во раната фаза го најавија триумфот. Бесмир Бојку во 9. минута го отвори резултатот со прецизен удар од 16 метри, а во 27. минута Марјан Радески од белата точка зголеми на 2-0. Претходно, по прегледот со ВАР, домашниот фудбалер Тодоров доби директен црвен картон, па Шкендија Арачиново продолжи со играч помалку.
Струга имаше уште неколку изгледни можности за поубедлива победа, но голманот Столевски со неколку одлични интервенции спречи повисок пораз на домаќините. Шкендија Арачиново, пак, не успеа да го искористи ниту еден од своите обиди за да се врати во натпреварот.
До гостински триумф стигна и Вардар, кој со минимални 1-0 ја совлада Брегалница во Штип. Стрелец на единствениот погодок беше Бобан Николов во 24. минута, кога ја искористи одбиената топка по центаршутот на Јанкулов и со удар од прва го совлада Филевски.
Брегалница имаше добар почеток и создаде неколку можности за водство, но не успеа да ја затресе мрежата на Талески. И во продолжението штипјани се обидуваа да стигнат до израмнување, но Вардар успеа да ја зачува предноста. Скопјани имаа можност и за втор погодок преку Закариќ, додека домаќините во финишот пропуштија шанса да се спасат од пораз.
Со овие три бода Вардар продолжува да ја води битката за шампионската титула, а во следното коло го очекува големо дерби на гостински терен против Шкендија. Брегалница, пак, ќе бара враќање на победничките патеки на гостувањето кај Арсими.
