Ракометарите на Македонија забележаа уште една победа на вториот тест во Србија, а во рамки на подготовките за Светското првество. На првиот тест Македонија беше подобра од Нови Београд, а сега избраниците на селекторот Кирил Лазаров го совладаа Динамо Панчево со резултат од 51:46.
Форматот беше исто како и на претходниот натпревар односно три по триесет минути за вкупно 90 минути игра. Ова беше одличен тест за Македонија бидејќи играше против третата екипа во српската Суперлига.
Репрезентацијата ќе се натпреварува во групата Д, заедно со репрезентациите на Унгарија, Холандија и Гвинеја. Натпреварите ќе се играат во Вараждин, Хрватска.
Првиот натпревар на Македонија е на 15. јануари против Унгарија, вториот на 17. јануари против Холандија, а третиот на 19. јануари против Гвинеја.
