Откако се раздели со Скопје, Муарем Муарем експресно пронајде нов клуб, се врати во Куманово каде ќе го води Башкими.
Поранешниот македонски репрезентативец веќе е промовиран на тренерското столче на кумановскиот прволигаш, каде одново ќе има можност да го води Башкими во предизвиците кои ќе ги има клубот во Првата македонска фудбалска лига, а тоа ќе биде опстанокот.
Муарем доаѓа на местото на Шабан Сулејмани, кој на почетокот на сезоната го презеде Башкими.
По осум кола Башкими е претпоследен на табелата со четири бодови, а има форма од една победа над Скопје, едно реми со Вардар и шест порази.
Муарем се враќа во добро позната средина, бидејќи минатата сезона седеше на тренерското столче на Башкими со што не би имал проблем да се прилагоди на новата средина. Фактот што во моментот има репрезентативна пауза го отвара просторот Муарем да го подготви тимот и да одработи мини подготовки, а негово деби ќе биде во рамките на деветтото коло, кога Башкими на домашен терен ќе игра против Струга Трим Лум, која во моментот е второпласирана на табелата во ПМФЛ.
