Македонската ракометна репрезентација продолжува со подготовките во Стара Пазова, Србија за настапот на Светското првенство, а Филип Кузмановски вели дека расположението и мотивацијата во репрезентацијата е на високо ниво.
„Расположението и мотивацијата се на највисоко ниво. Пред нас е уште едно големо првенство. Сите знаеме колку беше тешко да дојдеме до него и колку сите напорно работиме за да бидиме дел од овој колектив. Од прв ден почнавме со анализа на нашите противници. Ќе се соочиме со квалитетни репрезентации, мораме да бидеме добро подготвени, и физички и тактички. Ќе имаме доволно време да се спремиме до стартот на првенството. Во следниот период ќе одиграме и контролни натпревари на кои ќе можеме да го пробаме сето она што го подготвуваме за нашата група“, вели Кузмановски.
Репрезентацијата ќе се натпреварува во групата Д, заедно со репрезентациите на Унгарија, Холандија и Гвинеја. Натпреварите ќе се играат во Вараждин, Хрватска.
Првиот натпревар на Македонија е на 15. јануари против Унгарија, вториот на 17. јануари против Холандија, а третиот на 19. јануари против Гвинеја.
