ГРК Охрид ќе ја има предноста на домашниот терен во двата натпревари од второто коло на ЕХФ Европскиот Куп против турскиот Спор Тото СК.
Актуелниот освојувач на трофејот во ова натпреварување договори целиот двомеч да се одигра во СРЦ „Билјанини Извори“, па „гладијаторите“ ќе имаат поддршка од своите навивачи во двете средби.
Првиот натпревар меѓу Охрид и Спор Тото е закажан за петок, 23 октомври, со почеток од 18:30 часот. Реваншот ќе се одигра само еден ден подоцна, во сабота, 24 октомври, исто така од 18:30 часот, повторно во „Билјанини Извори“.
Така, турскиот состав ќе гостува во Охрид во двата дена, а македонскиот претставник ќе се обиде со две домашни победи да го обезбеди пласманот во третото коло од ЕХФ Европскиот Куп.
