Македонскиот тенисер Калин Ивановски успешно го мина првото коло на ИТФ турнирот во чешкиот град Пардубице, кој се игра за награден фонд од 30.000 американски долари. Ивановски го совлада домашниот тенисер Патрик Хомола со 2-0 во сетови (6:4, 6:4).
На стартот од мечот беа разменети два брејка. Ивановски прв го загуби својот сервис, но веднаш возврати со ри-брејк. Клучниот момент во првиот сет се случи во седмиот гем, кога македонскиот тенисер направи брејк по 18 одиграни поени и поведе со 4:3, а потоа го задржа сервисот за освојување на сетот со 6:4.
Во вториот сет повторно се водеше голема борба. Клучен беше осмиот гем, во кој Ивановски по 16 одиграни поени успеа да изедначи на 4:4, притоа спасувајќи три брејк-топки. Веќе во следниот гем направи брејк за водство од 5:4, а потоа без загубен поен го освои својот сервис-гем и со ас-сервис го затвори мечот.
Во второто коло Ивановски ќе се соочи со Клаус Пенинг од Германија, кој на стартот го совлада Чехот Мартин Сукал со 2-0 во сетови.
