Фудбалот во Гостивар добива подобри услови за работа и одржување на натпревари, откако на теренот со вештачка трева беа поставени дополнителни рефлектори.
Од Општинскиот фудбалски сојуз (ОФС) Гостивар ја поздравија реализацијата, истакнувајќи дека новото осветлување значително ги подобрува условите за тренинг и одигрување натпревари, особено во периодите кога дневната светлина не дозволува нормално одржување на активностите.
Во име на ОФС Гостивар, упатена е благодарност до претседателот на Фудбалската федерација на Македонија, Масар Омерагиќ, членовите на Управниот одбор, претседателот на ОФС Гостивар, Берат Исмаили, како и до директорот на ЈП „Ринија“, за соработката и ангажманот околу поставувањето на дополнителните рефлектори.
Од ОФС Гостивар посочуваат дека ваквите вложувања се особено значајни за младите фудбалери и клубовите, бидејќи создаваат подобри услови за тренинг, развој и натпреварување. Со подобреното осветлување, теренот со вештачка трева во Гостивар добива дополнителна функционалност, а локалниот фудбал нова инфраструктурна поддршка за понатамошен развој.
