Тиквеш вечерва го игра реваншот против Еш од Луксембург во првото коло од ЕХФ Европскиот куп, во натпревар во кој кавадарчани ќе бркаат негатива од три гола. Првиот дуел заврши со победа на гостите од 30-27, па македонскиот претставник сега има 60 минути за пресврт и пласман во следната рунда.
На првата средба Тиквеш имаше добар старт и поведе со 4-1, но Еш успеа да се врати и на полувреме се замина со 14-14. Во вториот дел гостите го презедоа резултатскиот тек и стигнаа до највисоки четири гола предност, но кавадарчани во финишот се доближија на 27-26. Сепак, Еш беше поконцентриран во завршницата и со серија во последните минути стигна до три гола предност.
Бен Махфуд беше најефикасен кај Тиквеш со девет гола, а Ончев постигна пет. Кај Еш, Аговиќ реализираше шест, додека Аранда постигна пет погодоци. Еден од проблемите за домашниот состав во првиот меч беше и голманската поддршка – Тиквеш имаше само четири одбрани, наспроти 15 интервенции на голманите на Еш.
Сепак, поразот од три гола не ја затвори европската приказна. Тиквеш повторно ќе игра во „Јасмин“, каде што овојпат ќе биде формален гостин, а за пласман понатаму му е потребна победа со најмалку четири гола разлика.
Во пресрет на реваншот, токму Бен Махфуд упати порака до навивачите, со која ја презеде одговорноста за првиот натпревар и побара поддршка од трибините:
„Пред сè, сакаме да им се извиниме на нашите Лозари и на цело Кавадарци. На денешниот натпревар направивме грешки, а противникот знаеше да ги искористи. Но, ова беа само првите 60 минути. Утре нè очекуваат нови 60 минути и нова борба. Можам да ветам дека ќе дадеме 1000% од себе за Тиквеш и за Кавадарци. Ќе се бориме до последната секунда и ќе оставиме сè на теренот. Уште еднаш им се извинуваме на нашите навивачи и ги повикуваме утре повторно да дојдат во „Јасмин“ и да бидат со нас. Потребна ни е вашата поддршка и ветуваме дека нема да ве разочараме.”- изјави Махфуд.
Реваншот е закажан за денес од 18:00 часот во салата „Јасмин“, а Тиквеш со поддршка од „Лозари“ ќе се обиде да ја анулира негативата и да продолжи во второто коло од ЕХФ Европскиот куп. На кавадарчани им остануваат уште 60 минути за европски пресврт.
