На 6 септември се одржа Купот на Македонија за пионери и пионерки 2026, во организација на Атлетската федерација на Македонија. Натпреварувањето се реализираше во два града, па фрлачките дисциплини беа одржани во Куманово, додека тркачките и скокачките дисциплини се одржаа на Градскиот стадион во Велес.
Младите атлетичари и атлетичарки прикажаа одлични настапи, голема борбеност и мотивираност во текот на целиот натпреварувачки ден, а беа забележани и повеќе индивидуални резултати кои заслужуваат внимание.
Кај пионерите, Арти Џеладини од Камјани стигна до две победи, откако беше најбрз на 100 метри со резултат 12.05 секунди, а потоа триумфираше и на 300 метри со 38.90 секунди. Одличен настап имаше и Антонио Каракабаков од Аеродром, кој го освои првото место во скок во далечина со прескокнати 5,70 метри.
Кај пионерките, Теодора Наумова од Охрид Трчат го оствари најдобриот резултат на 100 метри, со време од 13.43 секунди, додека Ељана Салаи од Камјани имаше одлично трчање на 300 метри, завршувајќи ја дисциплината со резултат 44.35 секунди.
Во екипниот пласман кај пионерите, шампионската титула му припадна на Камјани, кој Купот го заврши со 38 бодови. Второто место го освои Аеродром со 35 бодови, додека трет беше Охрид Трчат со 32 бодови.
Кај пионерките, првото место во екипниот пласман го освои Работнички со убедливи 93 бодови. Второпласиран беше Куманово со 61 бод, додека третото место му припадна на Охрид Трчат со 47 бодови.
Така, Купот на Македонија за пионери и пионерки 2026 донесе интересни натпревари, одлични индивидуални резултати и силна конкуренција, потврдувајќи дека македонската атлетика има млад потенцијал кој продолжува да се развива.
