Несреќниот пораз од Прилеп е минато, Младост се фокусира на следните предизвици во Супер лигата, во рамки на третото коло тимот на домашен терен ќе игра против Вардар.
Новото засилување на Младост, Ахмед Мајдоуб, во ексклузивна изјава за Спортска Мрежа зборуваше за мечот со Прилеп, кој вели дека загубиле концентрација во последните пет минути, но притоа потенцираше дека ништо не е загубено бидејќи е почеток на сезоната.
„Игравме добро во текот на целиот натпревар, но ја загубивме концентрацијата во последните пет минути. Тоа може да му се случи секому. Сезоната е само на почетокот и ништо не е загубено – ќе продолжиме да играме добро и ќе се стремиме кон победа на секој натпревар“, вели Тунижанецот.
Мајдоуб за Спортска Мрежа истакна дека одлично е адаптирал во Богданци, дополнувајќи дека малиот град од Југот на Македонија живее и дише за ракометот.
„Совршено се адаптирав, а и соиграчите одлично ме прифатија. Животот овде е одличен – градот живее и дише за ракометот, а јас сум среќен што играм за овој тим. Ние сме како едно семејство“, вели Ахмед Мајдоуб.
Тунижанецот го најави и мечот со Вардар, потенцирајќи дека кога се игра против голем тим како Вардар, мотивацијата секогаш е на највисоко ниво.
„Мотивацијата секогаш е на највисоко ниво кога играме против голем тим како Вардар. На нас е да се бориме и да го дадеме максимумот, а резултатот на крајот ќе покаже каков ќе биде исходот. Атмосферата е одлична“, ни изјави ракометарот на Младост.
Натпреварот меѓу Младост и Вардар ќе се игра в сабота, во салата „Млаз“ во Богданци, со почеток во 18 часот.
