Еурофарм Пелистер продолжува со унапредување на условите за функционирање на клубот, а најновата новина е модерниот и брендиран клупски автобус со кој ракометарите ќе патуваат на натпреварите.
Автобусот е дизајниран во препознатливите зелено-бели бои на битолскиот клуб, а на него е испишан и мотото „Само еден тим, само еден град“, со што уште еднаш се истакнува поврзаноста меѓу клубот и Битола.
Новиот автобус ќе биде наменет за транспорт на екипата на натпреварите од домашното првенство, како и на средбите во Регионалната лига, обезбедувајќи дополнителен комфор и подобри услови при патувањата.
Еурофарм Пелистер во новата сезона ќе има и европски предизвици како македонски претставник во Европската лига на ЕХФ, па новото превозно средство доаѓа во период кога клубот продолжува да ги подигнува стандардите и надвор од теренот.
