На вториот ден од развојниот турнир за девојчиња до 15 години во Струмица, македонската репрезентација претрпе пораз од Црна Гора со 3:1.
Македонија го отвори резултатот во 16. минута преку Јонида Лика, која донесе предност за нашата селекција. Црна Гора израмни во 65. минута со голот на Јелена Сариќ.
Црногорките направија целосен пресврт во 81. минута, кога Летиција Хабибовиќ погоди за 2:1, а конечните 3:1 ги постави Сариќ со својот втор гол во самиот финиш на натпреварот.
На вториот натпревар од денот, Турција убедливо ја совлада Молдавија со 6:0, при што сите шест гола беа постигнати во првото полувреме.
Хет-трик постигна Мари Нила Суливан, додека по еден погодок запишаа Мејра Ферик, Су Белинај Тунчел и Лина Бухан.
По две одиграни кола, Турција е на врвот на табелата со максимални шест бода. Црна Гора и Молдавија имаат по три бода, додека Македонија е на последното место без освоен бод.
Последното коло е закажано за в среда од 11:00 часот. Македонија ќе се сретне со Турција на стадионот „Кукуш“ во Турново, додека Црна Гора и Молдавија ќе ги одмерат силите на стадионот „Пандев“ во Струмица.
