Еурофарм Пелистер 2 продолжува да го комплетира составот за новата сезона, а битолскиот тим доби засилување на десната бековска позиција со враќањето на Лука Георгиевски.
Младиот битолчанец повторно ќе го облече „зелено-белиот“ дрес, откако минатата сезона во пролетниот дел настапуваше за Прилеп. Со прилепскиот тим Георгиевски го освои првото место во суперлигашкиот плеј-аут, а сега повторно се враќа во составот на Еурофарм Пелистер 2.
Георгиевски е младински репрезентативец на Македонија и зад себе веќе има значајно искуство за својата возраст. Настапуваше во младинската Лига на шампиони со Еурофарм Пелистер, а со националниот тим има учества и на кадетско и на младинско Европско првенство.
Неговото враќање претставува дополнителна опција за тренерскиот штаб и продолжение на определбата на Еурофарм Пелистер 2 да гради тим со млади и перспективни ракометари.
Битолчани во изминатиот период активно се подготвуваат за новата сезона, а веќе имаа можност да одиграат и силна проверка против првиот тим на Еурофарм Пелистер. Во „братското дерби“ одиграно во спортската сала „Боро Чурлевски“, поискусниот состав славеше над вториот тим.
Следен предизвик за Еурофарм Пелистер 2 е настапот на Меморијалниот турнир „Миле Нешковски“ во Прилеп, кој започнува денес. Таму младите битолчани ќе имаат нова можност за силни натпревари и дополнително темпирање на формата пред стартот на официјалните натпревари.
