Загреб без милост кон Египет, втор триумф на „Крсте Андоновски“ и чекор поблиску до полуфинале

Ракометарите на Загреб продолжуваат со одличниот настап на петтото издание на меморијалниот турнир „Крсте Андоновски“ во Охрид. Хрватскиот шампион вечерва убедливо ја совлада младинската репрезентација на Египет со 38-28 и стигна до втората победа во групата А.

Загреб уште од самиот почеток наметна силно темпо и брзо ја презеде контролата врз натпреварот. Хрватите беа сигурни во нападот и цврсти во одбраната, па по првите 30 минути имаа убедлива предност од седум гола, 20-13.

Во второто полувреме избраниците на Хрвоје Хорват без поголеми проблеми ја одржуваа разликата и постепено ја зголемуваа предноста. Египет немаше одговор за играта на противникот, па Загреб рутински го приведе натпреварот до крај и славеше со 38-28.

Најефикасен во победничкиот состав беше Филип Главаш со девет погодоци, додека Петар Топиќ постигна седум.

За Загреб ова е втора победа на турнирот, откако претходно го совлада и составот на Војводина со 24-21. Со четири освоени бода хрватскиот тим моментално е лидер во групата А.

Охрид е втор со два бода, но има одиграно натпревар помалку. Доколку охриѓани слават против Војводина, ќе дојдат до четири бода и ќе имаат можност во директниот дуел со Загреб да се борат за првото место во групата.