Претседателот на ФИБА Европа, Хорхе Гарбахоса, беше во посета на Гевгелија, каде од трибините го проследи натпреварот меѓу кадетските репрезентации на Македонија и Украина на Европското првенство од Дивизијата „Б“ за кошаркари до 16 години.
Гарбахоса повторно допатува во Македонија, откако претходно беше гостин на Младинската кошаркарска конвенција во Скопје. Овојпат неговата посета беше во рамки на поканата од раководството на Кошаркарската федерација на Македонија и градоначалникот на Општина Гевгелија.
Во рамки на посетата, градоначалникот на Општина Гевгелија, Андон Сарамандов, и претседателот на Кошаркарската федерација на Македонија, Томче Главчев, му посакаа добредојде на првиот човек на ФИБА Европа.
Како знак на внимание и гостопримство, на Гарбахоса му беше врачен специјално изработен дрес на КК Кожув од Гевгелија, како симболичен подарок по повод неговата посета на градот кој во тие денови беше еден од центрите на европската младинска кошарка.
Посетата на Гарбахоса беше уште една потврда за добрата соработка меѓу ФИБА Европа и Кошаркарската федерација на Македонија, како и за значењето што европската кошаркарска организација го придава на развојот и промоцијата на младинската кошарка.
