Фудбалската академија Мојсов од Кавадарци официјално ги отвори уписите за новата сезона и ги повикува сите деца на возраст од 5 до 14 години да станат дел од современа фудбалска средина, каде покрај спортскиот развој, големо внимание ќе се посветува и на градењето на карактерот.
Академијата ќе работи под водство на Ѓорѓи Мојсов, поранешен фудбалер и докажан тренер со УЕФА Про лиценца, како и Даниел Мојсов, поранешен професионален фудбалер со богато меѓународно и репрезентативно искуство, кој поседува УЕФА Б лиценца.
Во академијата потенцираат дека нивната мисија не е само создавање фудбалери, туку и воспитување на млади личности со вистински спортски вредности. Нивната филозофија е заснована на трите принципи: Develop – Развој, Believe – Верувај и Achieve – Постигни, со индивидуален пристап кон секое дете и постепен развој преку квалитетна и посветена работа.
Секој член на академијата ќе има можност да тренира по современи европски стандарди, со посебен акцент на усовршување на техниката, координацијата, брзината и фудбалската интелигенција. Истовремено ќе се работи на развојот на дисциплината, самодовербата, победничкиот менталитет и правилното донесување одлуки, во безбедна, позитивна и мотивирачка средина.
Дополнително, академијата ќе се натпреварува во сите детски лиги, овозможувајќи им на младите фудбалери континуиран натпреварувачки развој и стекнување драгоцено искуство.
Тренинзите ќе се реализираат на сопствен вештачки терен, а од академијата испраќаат јасна порака дека големите фудбалери не се создаваат преку ноќ, туку со секојдневна работа, труд и посветеност.
Заинтересираните родители можат да ги запишат своите деца на телефонските броеви 078 237 845 и 077 849 458.
Со мотото „Train Smart. Play Hard. Dream Big.“, Фудбалската академија Мојсов најавува професионална работа и создавање на нови генерации фудбалери, но и личности со вистински животни вредности.
