Машката репрезентација на Македонија до 18 години отпатува за Хрватска, каде од 24 јули до 2 август ќе настапи на Европското првенство од Дивизијата „Б“.
Континенталниот шампионат ќе се одржи во Ријека и Опатија, а на него ќе учествуваат 22 национални селекции. Трите најуспешни репрезентации ќе обезбедат пласман во елитната Дивизија „А“.
Македонските јуниори се дел од групата „Д“, во која ќе ги одмерат силите со репрезентациите на Грузија, Шведска, Унгарија и Босна и Херцеговина.
Избраниците на селекторот Миодраг Тодоровиќ настапот на првенството ќе го отворат со натпревар против Грузија, кој ќе биде првиот чекор во борбата за што подобар пласман.
Зад репрезентацијата е интензивен подготвителен период кој траеше речиси еден месец. Во тој период беа одиграни повеќе контролни натпревари, меѓу кои два гостински дуели против Бугарија и пријателски натпревар со Косово, преку кои стручниот штаб ги финализираше подготовките за Европското првенство.
И покрај неколкуте повреди со кои се соочи тимот во текот на подготовките, селекторот Миодраг Тодоровиќ истакна дека атмосферата во репрезентацијата е одлична и дека сите се максимално фокусирани на успешен старт и добар настап на шампионатот.
„Атмосферата во репрезентацијата е одлична, на највисоко ниво. За жал, имавме неколку повреди кои ги сменија плановите во текот на подготовките, но тоа е составен дел од спортот. Имавме доволно време да ги анализираме противниците, а целиот наш фокус е насочен кон првиот натпревар против Грузија. Одиме меч по меч и на секој натпревар ќе играме на победа. Тоа е наша обврска кога го носиме дресот со државниот грб. Ќе се бориме секоја секунда за Македонија, затоа што амбициите секогаш мора да бидат највисоки кога се игра за националниот тим“, изјави Тодоровиќ пред заминувањето за Хрватска.
Нашата селекција првиот натпревар ќе го отвори на 24 јули (петок), кога од 20:30 часот во спортската сала „Марино Цветковиќ“ во Опатија ќе се соочи со селекцијата на Грузија.
Веќе следниот ден, на 25 јули, од 18:00 часот во арената „Замет“ во Ријека, избраниците на селекторот Миодраг Тодоровиќ ќе играат против Босна и Херцеговина.
Третиот натпревар е закажан за 26 јули, кога во раниот термин од 10:30 часот, повторно во Опатија, Македонија ќе ги одмери силите со репрезентацијата на Унгарија.
По дводневна пауза, на 29 јули од 10:30 часот, македонските јуниори ќе го одиграат и последниот натпревар од групната фаза против селекцијата на Шведска.
Во зависност од пласманот во групата „Д“, Македонија ќе ги дознае противниците во разигрувањето, каде ќе се бори за конечниот пласман на Европското првенство.
МАКЕДОНИЈА „ПОД 18“ НА ЕП ДИВИЗИЈА „Б“ ВО РИЈЕКА И ОПАТИЈА
- Григориј Ѓорѓевиќ
- Дамјан Данев
- Филип Сребров
- Алексеј Нешовиќ
- Дамјан Стојановски
- Марко Бајалџиев
- Ѓорѓи Цветковски
- Дамјан Стојановски
- Павел Ѓиноски
- Лука Чучанов
- Михајло Малиниќ
- Филип Алековски
СЕЛЕКТОР: Миодраг Тодоровиќ
АСИСТЕНТ-ТРЕНЕР: Дамјан Вељанов
АСИСТЕНТ-ТРЕНЕР: Илија Стамболџиев
ФИЗИОТЕРАПЕВТ: Никола Станојковски
ДОКТОР: Ивана Харбов
ТИМСКИ ВОДАЧ: Бранко Андриевски
ПРИДРУЖЕН СУДИЈА: Андреј Златевски
