Повратникот во ракометната Супер лига, Младост од Богданци активно работи на формирањето на ростерот за новата сезона.
Во дресот на клубот од Богданци и во новата сезона ќе настапува искусното лево крило Зоран Стојановски, кој беше еден од важните алки во тимот што избори пласман во Супер лигата. Со своето долгогодишно искуство, Стојановски претставува значајна поддршка и лидер на теренот, но и пример за помладите ракометари во екипата.
Велешанецот својата ракометна кариера ја започна во школата на Борец, а во текот на годините настапуваше и за Овче Поле, Борец ФЛ, Голден Арт и Тиквеш, градејќи богато искуство кое сега ќе го стави во функција на Младост и во суперлигашката конкуренција.
Покрај формирањето на ростерот, раководството на клубот интензивно работи и на реконструкцијата и уредувањето на спортската сала „Млаз“, со цел значително да се подобрат условите за тренинг, одигрување натпревари и престојот на навивачите.
Во наредниот период Спортска Мрежа ќе ја следи реконструкцијата на салата и ексклузивно ќе ја пренесе атмосферата од обновувањето на еден од најпознатите ракометни објекти во Македонија. Салата „Млаз“ со години важеше за вистинска неосвоива тврдина, а во минатото често се велеше дека екипата која ќе победи во Богданци е најсериозен кандидат за шампионската титула.
Со задржувањето на искусниот Стојановски и паралелните вложувања во инфраструктурата, Младост Богданци испраќа јасна порака дека сака достоинствено да се претстави во својата прва сезона меѓу најдобрите македонски ракометни клубови.
