ГРК Тиквеш продолжува да го комплетира ростерот за новата сезона, а ново име во редовите на кавадаречкиот суперлигаш е 19-годишниот кружен напаѓач Борјан Цековски, кој важи за еден од најперспективните млади пивоти во македонскиот ракомет.
Цековски доаѓа од редовите на Куманово, а во својата досегашна кариера настапуваше и за КЛ7 Свети Николе, Овче Поле и Радовиш. Дел од сезоната 2024/25 ја мина и во дресот на Младост Богданци, каде играше како позајмен ракометар.
Со неговото ангажирање, Тиквеш уште еднаш потврдува дека покрај искусните играчи, сериозно смета и на младите домашни ракометари, кои треба да бидат важен дел од иднината на клубот.
Цековски е третото летно засилување на кавадаречкиот состав. Претходно клубот ги промовираше искусните леви бекови Тоше Ончев и Мохамед Азиз Бен Махфуд, со што значително ја засили бековската линија, а сега дополнително ја освежува и позицијата кружен напаѓач.
По успешната мината сезона, во која Тиквеш го освои шестото место во суперлигашкиот плеј-оф, клубот со големи амбиции влегува во новите предизвици. Покрај домашното првенство, кавадаречкиот состав се пријави и за настап во ЕХФ Европскиот куп, па раководството активно работи на создавање конкурентен тим кој ќе може достојно да одговори на обврските на домашната и меѓународната сцена.
Со тренерот Кристијан Грчевски, кој останува на клупата и во новата сезона, Тиквеш продолжува со континуитетот во работата и со јасна цел – уште поконкурентни настапи и нови успеси.
