Македонска Каменица доби уште еден спортски колектив и официјално влезе на ракометната мапа на Македонија. Со формирањето на Ракометниот клуб „Сокол Саса“, градот за првпат ќе има свој ракометен претставник, што претставува значаен чекор во развојот на спортот и отвора нови можности за младите генерации.
Основањето на РК „Сокол Саса“ е историски момент за Македонска Каменица, која досега беше препознатлива по својата богата спортска традиција во фудбалот и кошарката. Во иднина, децата и младите ќе имаат можност да се занимаваат и со ракомет, спорт кој со години е еден од најуспешните и најпопуларните во Македонија.
Со формирањето на новиот клуб се зголемува и бројот на ракометни колективи во Источна Македонија, регион во кој во изминатиот период недостасуваа вакви спортски средини. Очекувањата се РК „Сокол Саса“ својата работа да ја започне со најмладите категории, создавајќи база за идните генерации ракометари.
„Со големо задоволство ја споделувам убавата вест дека Македонска Каменица го доби својот прв ракометен клуб – РК Сокол Саса. Формирањето на нов спортски колектив е повеќе од основање на клуб. Тоа е нова можност за нашите деца и млади, нов простор за дружење, развој и спортски успеси, но и уште еден важен чекор во збогатувањето на спортскиот живот во Македонска Каменица. Нашата општина отсекогаш била препознатлива по спортскиот дух, по традицијата и по луѓето кои со ентузијазам создаваат нови вредности. Верувам дека РК Сокол Саса ќе стане место каде ќе растат нови генерации спортисти, ќе се градат пријателства и ќе се негуваат вистинските спортски и човечки вредности. На основачите им честитам за храброста, визијата и вложениот труд, а на новиот клуб му посакувам многу успеси, исполнети трибини и бројни поводи за радост и гордост на Македонска Каменица“, вели градоначалничката на општина Македонска Каменица, Соња Стаменкова.
Нејзината порака ја потврдува определбата на локалната самоуправа за поддршка на спортот и младите, а формирањето на РК „Сокол Саса“ се очекува дополнително да го збогати спортскиот живот во градот и да придонесе за создавање нови таленти.
Македонска Каменица веќе со години е позната по успешните спортски колективи. ФК Каменица Саса со децении е симбол на градот, ЖФК Каменица Саса во минатото беше шампион на Македонија, освојувач на Купот и учесник во квалификациите за Лигата на шампионите, додека ЖКК Баскет Кам неодамна пред својата публика го освои четвртиот Куп-трофеј во клупската историја.
Со РК „Сокол Саса“, Македонска Каменица добива уште еден клуб кој ќе работи на развојот на младите спортисти, а воедно испишува ново и значајно поглавје во својата спортска историја.
