Македонските Дејвис куп репрезентативци Калин Ивановски и Олег Приходко обезбедија пласман во четвртфиналето на ИТФ М25 турнирот во Загреб, откако остварија победи во натпреварите од второто коло.
Ивановски славеше против Гркот Павлос Циципас со 2-0 во сетови (7:6(8), 7:5) по 2 часа и 13 минути игра. Првиот сет донесе голема борба без ниту еден брејк, а македонскиот тенисер беше поуспешен во тај-брејкот со 10:8. Во вториот сет Ивановски го направи клучниот брејк во 11. гем за водство од 6:5, по што сигурно го приведе мечот кон крај за конечна победа.
Приходко, пак, по голема борба го совлада Хлиб Секачов со 2-1 во сетови (6:0, 4:6, 6:4) за 2 часа и 11 минути. Тој доминираше во првиот сет, оставајќи го противникот без освоен гем. Во вториот сет Секачов успеа да возврати и да израмни на 1-1, но во решавачкиот дел Приходко направи брејк за водство од 4:3, што се покажа како клучно за конечниот триумф.
Подоцна во текот на денот македонските тенисери ќе настапат и во конкуренција на двојки. Ивановски ќе игра во тандем со Амар Хусеиновиќ, додека Приходко ќе настапи заедно со Андреј Чепелев.
