Прволигашот Тиквеш продолжува активно да го засилува играчкиот кадар во пресрет на новата сезона во Првата македонска фудбалска лига. Ново име во редовите на кавадаречкиот клуб е младиот и перспективен играч за врска Теодор Николовски, кој стави потпис на договор со важност до 2029 година.
Дваесетгодишниот фудбалер пристигнува од редовите на Работнички, каде во изминатата сезона беше еден од стандардните првотимци. Николовски забележа 26 настапи во првенството, при што запиша три асистенции, а својот придонес го даде и во Купот на Македонија, каде постигна два погодоци.
Покрај клупските настапи, Николовски е и македонски младински репрезентативец. Тој настапува за репрезентацијата на Македонија до 21 година, за која досега има запишано девет настапи. Неговото присуство во националниот тим е потврда за квалитетот и потенцијалот што ги поседува, а токму тие квалитети го направија интересен за раководството на Тиквеш.
Станува збор за играч кој и покрај младата возраст веќе има значајно искуство во домашниот шампионат и важи за еден од најперспективните фудбалери од средниот ред во Македонија.
Од клубот очекуваат тој да донесе дополнителен квалитет во играта и да помогне во исполнувањето на амбициите во новата сезона.
