Младите таленти на Овче Поле ќе тренираат според методологијата на Реал Мадрид

Тројца млади фудбалери од генерацијата 2015 на ФК Овче Поле од Свети Николе ќе имаат можност да бидат дел од престижниот Реал Мадрид Камп, кој ќе се одржи во Краљево, Србија, во периодот од 29 јуни до 3 јули.

Тино Николов, Јоаким Колев и Благојче Гроздевски ќе бидат дел од кампот наменет за деца на возраст од 6 до 17 години, каде што ќе имаат можност да тренираат според методологијата на еден од најголемите светски клубови.

Од ФК Овче Поле не ја кријат гордоста што нивните млади таленти ќе учествуваат на овој реномиран камп, кој покрај фудбалските вештини промовира и вистински спортски вредности како пријателството, дисциплината, посветеноста и тимскиот дух.

Во рамките на кампот, учесниците ќе тренираат под водство на официјални тренери од академијата на Реал Мадрид, а секојдневно ќе имаат тренинзи во времетраење од еден час и 45 минути во текот на пет дена. Секој учесник ќе добие и официјална опрема со обележјата на Фондацијата Реал Мадрид (RMF), како и официјална диплома од клубот.

Ова признание за младите фудбалери на Овче Поле доаѓа по одличните настапи на генерацијата 2015, која неодамна го освои првото место на меѓународниот турнир „Охрид Куп“, одржан од 18 до 21 јуни во градот покрај Охридското Езеро.

Учеството на тројцата млади фудбалери на Реал Мадрид Камп претставува уште една потврда за квалитетната работа во ФК Овче Поле и одлична можност за дополнителен развој и стекнување нови искуства на меѓународно ниво.