Новиот суперлигаш- Младост Богданци продолжува да го засилува ростерот пред дебитантската сезона во елитата, а најново име во тимот ќе биде искусниот кружен напаѓач Владимир Бојаниќ.
Иако за неговите услуги интерес покажаа повеќе македонски клубови, српскиот интернационалец се одлучи кариерата да ја продолжи во Богданци, каде повторно ќе соработува со тренерот Горан Андоновски. Двајцата веќе работеа заедно во Охрид и очигледно добрата соработка била клучна за новото обединување.
Бојаниќ зад себе остави успешен четиригодишен период во Охрид. Со охридскиот состав се раздели на најдобар можен начин, освојувајќи го трофејот во Европскиот куп на ЕХФ, а во меѓувреме се стекна и со македонски пасош.
Младост Богданци веќе направи неколку значајни потези во пресрет на новата сезона. Клубот ги задржа Живојин Илиќ, Даниел Андоновски и Ѓорѓе Атанасов, а прв професионален договор потпиша младиот Никола Тасев. Во тимот пристигнаа и Тодор Узунчев, Славе Јанковски и Благој Панов, додека клубот се раздели со Кристијан Костадиновски, Лазар Адамовиќ, Никола Димитров и Жоао Гекас.
Со ангажманот на Бојаниќ, богданчани добиваат големо искуство и квалитет на линијата од шест метри, а амбициите за првата суперлигашка сезона стануваат сè појасни.
