Македонскиот освојувач на Купот на Македонија, Силекс, европската авантура во Конференциската лига ќе ја започне против белорускиот шампион Динамо Минск, но првиот натпревар нема да се игра во Белорусија.
Поради санкциите и мерките на УЕФА кон белоруските клубови, Динамо Минск своите меѓународни натпревари и понатаму е принуден да ги игра на неутрален терен. Така, дуелот од првото квалификациско коло, кој е закажан за 9 јули, ќе се одигра во бугарска Стара Загора на стадионот на Берое и без присуство на публика.
Одлуката на УЕФА е во сила уште од 2022 година, кога на белоруските клубови и репрезентации им беше забрането да бидат домаќини на своја територија поради воениот конфликт во Украина.
Реванш натпреварот меѓу Силекс и Динамо Минск е закажан за 16 јули и ќе се одигра во Македонија на тренинг центарот „Петар Милошевски“ при ФФМ, бидејќи стадионот во Кратово не ги исполнува условите за европски натпревари.
Кратовци ги очекува сериозен предизвик против искусниот белоруски претставник, а доколку успеат да обезбедат пласман во следната рунда, таму ќе ги чека нов тежок европски тест. Потенцијален противник во второто квалификациско коло е азербејџански Нефчи, клуб со богато европско искуство.
Силекс ова лето се враќа на европската сцена со големи амбиции, а првата пречка на патот кон подолг настап во Конференциската лига ќе биде токму Динамо Минск.
