Градоначалникот на Општина Ново Село, Ѓорѓе Божинов, оствари средба со фудбалерите, стручниот штаб и управата на ФК Огражден, откако клубот ја освои шампионската титула во Општинската фудбалска лига – Струмица и обезбеди пласман во Третата лига – Исток за сезоната 2026/2027.
На средбата се разговарало за успешната сезона на клубот, но и за идните планови и развојот на фудбалската инфраструктура во Ново Село. Божинов ја истакна својата поддршка за екипата која по долг период повторно донесе шампионска радост во општината.
„Остварив средба со Шампионите на општинската фудбалска лига 2025/2026, ФК Огражден од Ново Село. Голема е радоста што после 50 години повторно се враќа фудбалот во Ново Село на шампионска трака. Изразив силна поддршка на фудбалерите на ФК Огражден и разговаравме за идните планови и инвестиции на стадионот во Ново Село. Спортот и младите се наш фокус веќе петта година“, вели градоначалникот Божинов.
ФК Огражден зад себе има одлична сезона во која доминираше во Општинската фудбалска лига. Тимот првенството го заврши на првото место со освоени 31 бод, забележувајќи девет победи, четири нерешени резултати и само еден пораз.
Со освоената шампионска титула, клубот од Ново Село обезбеди место во Третата лига – Исток, каде следната сезона ќе има можност да ги потврди своите амбиции и да продолжи со успешните настапи.
Шампионската сезона на Огражден донесе голема радост кај љубителите на фудбалот во Ново Село, а поддршката од локалната самоуправа и најавените инвестиции во спортската инфраструктура претставуваат дополнителен мотив клубот да продолжи со развојот и во повисок ранг на натпреварување.
