Прволигашот Тиквеш официјално го промовираше Оливер Богатинов за нов шеф на стручниот штаб, откако двете страни постигнаа договор за двегодишна соработка.
Кавадаречкиот прволигаш со овој потег испраќа јасна порака за своите амбиции во периодот што следува. Во клубот веруваат дека искуството, професионалниот пристап и богатата кариера на Богатинов ќе претставуваат значајно засилување во остварувањето на зацртаните цели.
Од Тиквеш нагласуваат дека ангажманот на словенечкиот стратег не е решение за краток период, туку дел од долгорочна стратегија насочена кон развој на млади фудбалери, негување модерен стил на игра и создавање стабилен и препознатлив клуб кој во иднина ќе биде конкурентен и на европската сцена.
„Со големо задоволство му посакуваме Добредојде на Оливер Богатинов во ГФК Тиквеш 1930. Постигнавме договор за двегодишна соработка со тренер чие искуство, професионален пристап и кариера изградена во високо конкурентни фудбалски средини претставуваат значајно засилување за нашиот клуб. Ова не е одлука донесена за краткорочен успех, туку чекор кој целосно се вклопува во нашата долгорочна визија: развој на млади играчи, модерен фудбал и создавање стабилен и препознатлив клуб на европската сцена. Веруваме дека заедно започнуваме ново поглавје исполнето со амбиција, развој и напредок. Неговото назначување е јасен показател за амбициите и стандардите што ГФК Тиквеш 1930 ги поставува за својата иднина“, велат од кавадаречкиот прволигаш.
Богатинов зад себе има богато меѓународно искуство и работеше во повеќе познати словенечки клубови како Копер, Радомље, Алуминиј и Мура, а во Кавадарци пристигнува од редовите на Горица.
Со ангажманот на искусниот стратег, Тиквеш отвора ново поглавје во својата историја, со надеж дека токму Богатинов ќе биде човекот кој ќе ги реализира амбициозните планови на клубот во наредните сезони.
